Kryeministri nuk thotë të vërtetën, kur thotë se në zonat e mbrojtura nuk ka ndryshuar asgjë nga ligji i 2024, edhe kur flitet për peizazhet e mbrojtura. E vërteta është se Ligji nr. 21/2024 ndryshoi pikërisht filozofinë e mbrojtjes së tyre dhe hapi rrugën për ndërtime e zhvillime që më parë ishin të kufizuara.

Në ligjin e ri është hequr logjika e ndalimit. Janë fshirë konceptet e “kufizimit, eliminimit dhe parandalimit” të aktiviteteve të papërshtatshme dhe në vend të tyre është futur ideja e lejimit të ndërhyrjeve urbane, turistike dhe ekonomike brenda zonave të mbrojtura.

Edhe vetë përkufizimi i “Peizazhit të Mbrojtur” është ndryshuar. Ai nuk paraqitet më vetëm si një hapësirë që duhet ruajtur, por edhe si një territor që krijon mundësi për zhvillime turistike, agroturistike dhe veprimtari të tjera ekonomike. Për më tepër, ligji ia kalon qeverisë dhe Këshillit Kombëtar të Territorit kompetencën për të përcaktuar me vendime administrative se çfarë lejohet dhe çfarë ndalohet në këto zona. Pra, kufijtë e mbrojtjes nuk burojnë më qartë nga ligji, por varen nga vullneti i qeverisë.

Statusi formal i zonave të mbrojtura mund të ketë mbetur në letër, por në praktikë hapësira për ndërtime dhe zhvillime është zgjeruar ndjeshëm. Kjo është arsyeja pse sot shohim projekte që depërtojnë në territore që dikur konsideroheshin të paprekshme.

Nuk është rastësi që edhe Parlamenti Europian ka kërkuar shfuqizimin e këtyre ndryshimeve dhe rikthimin e një mbrojtjeje reale për zonat e mbrojtura. Kur një shqetësim ngrihet edhe në nivel europian, askush nuk mund të pretendojë se problemi nuk ekziston.

Pikërisht për këtë arsye, më 14 maj kam depozituar në Kuvend propozimin për shfuqizimin e Ligjit nr. 21/2024 dhe rikthimin e garancive që mbrojnë natyrën nga betonizimi dhe interesat afatshkurtra.

Mund ta mbani këtë nismë edhe disa ditë në sirtarët e shumicës, por nuk e dini sa kohë ju ka mbetur. Zëri qytetar po bëhet çdo ditë më i fortë dhe protestat për mbrojtjen e pasurisë kombëtare publike nuk do të ndalen.

The post Askush s’mund të gënjejë më qytetarët/ 15 qershor 2026 appeared first on Ina Zhupa.

Për ta shmangur këtë, sepse besoj se biem dakord që është thjesht vullnet për ta diskutuar mes kryetarëve të grupeve, për diasporën dua t’ju them: po, është e vërtetë që keni sjellë një email të premten në orën 23:00 për deputetët, pasi kisha dalë me një deklaratë publike ditën e mërkurë për mospërfshirjen e Kuvendit të Republikës së Shqipërisë, pasi ju kishit publikuar në faqen tuaj agjendën zyrtare. Në agjendën zyrtare nuk kishte asnjë deputet, as nënkryetari i Komisionit të Diasporës, meqenëse donit ta shmangnit opozitën.  Ne, nëse flasim për diasporën, do të duhej të ishim bashkë në organizim, do të duhej të ishim bashkë në ndarjen e paneleve dhe të objektivave. Realisht, përveç diskutimit, të cilin e the shumë mirë, the një të vërtetë të madhe: nuk i dëgjuam, por ne folëm. Pra, ata ishin si dëgjues. Ju kishit sjellë diasporën që t’ju dëgjonte, kur mund t’ju dëgjonin live edhe nga Facebook– u, por do të ishte mirë që t’i dëgjonit dhe të bënit ndonjë punë për ta.  

Ndoshta nuk e dini, por me ligj, e kemi kaluar këtu, ju e prishët fondin shqiptar të zhvillimit të diasporës. E kishim në ligj dhe e hoqët, sepse nuk u jepnit fonde që nga vitit 2022. Ka ardhur zëvendësministrja, e cila ka thënë: do ta shuajmë fare. Pra, në vend që t’i jepnit fonde, e hoqët fare nga ligji.  

Kërkesës së tyre, për një dhomë biznesi të diasporës, iu përgjigjët me zero. Ju duhet të keni akte për diasporën, për përfshirjen e saj reale, jo samite propagandistike, me panele ku janë ministra… 

(Bie gongu.)     

Ina Zhupa – …zëvendësministra dhe drejtorë drejtorish, ku njëri moderon dhe tjetri flet në panel, duke e dëgjuar njëri-tjetrin për sukseset dhe diaspora i duartroket.  

Niko Peleshi – Përfundoni fjalinë, ju lutem! 

Dëgjoni diasporën, bëni akte reale dhe në samitin e pestë jemi të gjithë të gatshëm të jemi aty, por kur e organizojmë bashkërisht dhe për interes së diasporës, jo të propagandës elektorale.  

Faleminderit!  

The post Replikë në Kuvend ndaj ministrit të jashtëm mbi mospërfshirjen e opozotës në Samitin e Diasporës 2026 / 16 prill 2026 appeared first on Ina Zhupa.

Ju Samitin e Diasporës e kishit titulluar: “Rrënjët të lartësojnë”. Rrënjët tona janë kudo, janë edhe në Maqedoninë e Veriut, dhe është detyra e shtetit shqiptar që të kujdeset sa herë cenohen të drejtat atje.  

Zoti Kryetar, për mënyrën se si e kishit organizuar Samitin e Diasporës, do t’ju ftoja, me shumë sinqeritet, meqenëse jeni duke diskutuar edhe Rregulloren e Kuvendit, që Komisionit të Turizmit dhe Kulturës t’ia hiqni diasporën për aq kohë sa e keni injoruar totalisht Kuvendin, për aq kohë sa qeveria nuk e pa të nevojshme që t’i përfshinte si pjesëmarrës deputetët e Kuvendit të Shqipërisë, Komisionin Parlamentar të Diasporës, për të qenë pjesë e organizimit të samitit, i cili i shërbente realisht diasporës! 

Ky samit, zoti ministër, meqë jeni këtu, do të duhej të kishte filluar me atë se çfarë u bë në tri samitet e mëparshme, cilat ishin objektivat që arritën dhe cilat janë objektivat e këtij të katërtit, por e kthyet në një samit propagandistik. Unë, për shembull, nuk arrita dot ta kuptoj, pasi ju kishit publikuar agjendën finale, se si u gjend folës Taulant Balla dhe me çfarë tagri ishte ai atje, përveçse me tagrin e drejtuesit politik të diasporës, sepse po të ishte si kryetar grupi, do të ishte detyrim që të gjithë kryetarët e grupeve parlamentare të ishin ftuar atje.  

Ju çdo gjë e përdorni për politikë dhe për qëllime elektorale, por, të paktën, kur vjen puna te shqiptarët e Maqedonisë së Veriut, le të bashkohemi, le të jetë detyrë e kryetarëve të grupeve për të bërë një deklaratë të përbashkët të Kuvendit të Shqipërisë. 

Faleminderit!  

The post Fjala për procedurë dhe qëndrim mbi protesten e drejtë të zhvilluar nga studentët e Maqedonisë së Veriut për përdorimin e gjuhës shqipe / 16 prill 2026 appeared first on Ina Zhupa.

Kjo lidhet me lirinë e shprehjes, me transparencën për publikun, me punën e dhjetëra gazetarëve, dhjetëra operatorëve, dhjetëra njerëzve që punojnë për interesin publik. Pra, të kërcënohet dhe të mos ketë asnjë reagim nga askush?! Këtu flitet për sigurinë e tij, por edhe për sigurinë e fjalës së gazetarëve që punojnë atje, të investigimeve që bëhen atje, të lajmeve që prodhohen nga një media, siç është “MCN TV”. Çështja e dytë që kam dhe që është shumë e rëndësishme, ndonëse këtu mungojnë ministrat, është binomi Kumbaro-AADF. Mirela Kumbaro na e futi AADF-në me të dyja këmbët në një ligj me porosi, në ligjin e trashëgimisë kulturore dhe sot AADF-ja është koncesionare e pothuajse të gjitha elementeve më të rëndësishme të trashëgimisë kulturore në Shqipëri: nga Butrinti, që e ka marrë me koncesion; tek Elbasani, që është futur te kalaja; në Gjirokastër, ku është AADF-ja, por edhe në Durrës me projektet TID e BID, është AADF-ja.

Pra, falë një ligji me porosi, të paguar nga vetë AADF-ja, ku janë deklaruar 150 mijë dollarë të paguar për ligjin e trashëgimisë kulturore, AADF-ja është shtrirë kudo dhe sot e kemi kudo. Mirela tani ka marrë arsimin dhe, meqenëse Mirela ka marrë arsimin, binomi Mirela-AADF duhet të shtrihet edhe në arsim.  Keni sjellë një projektligj në Kuvend, i cili është të vësh duart në kokë, se nuk gjen në asnjë vend të Europës dhe në asnjë vend të botës që detyrat e shtetit t’i jepen një fondacioni privat. Keni sjellë projektligjin që parashikon shkrirjen e Qendrës së Shërbimeve Arsimore, siç njihet QSHA-ja, dhe krijimin e një Agjencie Kombëtare të Shërbimeve Arsimore, ku, me demek, do të jetë shtetërore, por de facto do të ketë vulën dhe kontrollin e AADF-së. Në relacionin shpjegues gjeni: “Ky projektligj është hartuar në bashkëpunim me Fondacionin ShqiptaroAmerikan për Zhvillim (AADF)”. AADF-ja na bëka projektligje!

Pra, në këtë vend bën projektligje AADF-ja, një subjekt privat, për të marrë gjëra shtetërore. Për këtë subjekt më në fund kemi një shkresë nga ambasada amerikane (shpëtoni edhe ju, që kishit merakun që ishin amerikanët apo jo) që thotë: nuk është institucion shtetëror amerikan, nuk ka lidhje me ne, është një organizatë private që ka aktivitetin e vet. Të sqarohemi edhe për këtë pjesë, sepse ishit të pasqaruar kur do të merrte Butrintin. I gjithë procesi, që nga njohja e diplomave të studentëve, të cilët kanë studiuar jashtë dhe duan të vijnë në Shqipëri, që tek tezat e Maturës Shtetërore, te licencimi i mjekëve, infermierëve, mësuesve, tek tarifat që do të paguajnë studentët shqiptarë për të marrë një vërtetim për të bërë një provim, të gjitha këto do t’i vendosë AADF-ja, sepse me bordin që ju keni krijuar, është e njëjta gjë. Është e frikshme se si i njëjti projektligj merret nga trashëgimia dhe çohet tek arsimi, vetëm sepse shkon Mirela Kumbaro dhe interesat e saj klientelistë.

Thuhet se risi është përbërja e këshillit drejtues të agjencisë së re dhe në këtë bord, donatorë do të jenë përfaqësuesit e partnerëve strategjikë. Kjo do të thotë se do të jenë përfaqësuesit e AADF-së. Pra, bordin na e merr prapë AADF-ja, siç e kanë marrë dhe siç e ka në të gjitha projektet e trashëgimisë.  Ky është fundi i një shteti, i cili nuk mban përgjegjësi për një nga shtyllat themelore, kërkesat e Kushtetutës, siç është arsimi dhe detyrimi për të ofruar standarde në arsim, që ia lini dhe i merr AADF-ja. AADF-ja bëhet Zoti i arsimit në Shqipëri, ku ministria de facto qëndron, por de jure nuk ka asnjë rol në proceset thelbësore, që lidhen drejtpërdrejt me cilësinë e arsimit në Shqipëri, që nga tezat e Maturës Shtetërore. 

Kjo është një çështje që, sigurisht, fillon sot; është një çështje që nuk lihet me kaq; është një turp i madh pafytyrësia e ministres së Arsimit që të marrë të njëjtët klientë. Pra, ashtu siç merr drejtorët që i ka në ndjekje penale, merr të njëjtët klientë privatë, siç ka AADF-në, që e kalon nga trashëgimia te zonat e mbrojtura, kur ishte te Ministria e Mjedisit, dhe tani te Ministria e Arsimit. Hiqni dorë nga këto paçavure, sepse nuk tregojnë… 

The post Fjalim në Kuvendin e Shqipërisë për kërcënimin e mediave në Shqipëri dhe çeshtja e projektit TID-Aadf në Durrës / 30 Mars 2026 appeared first on Ina Zhupa.

Sa për kolegët, zonja Kushi, ju i kishit përjashtuar, pra nuk kishte si të votonte zonja Vokshi, kur ju e përjashtuat 3 muaj nga Kuvendi. Të gjithë deputetët e Partisë Demokratike dhe të opozitës, që kanë qenë në seancë, e kanë votuar projektligjin. Ajo, për të cilën duhet të të vijë turp, është të sjellësh një zgjidhje gjysmake për mësuesit, pasi, me një të rënë të lapsit, u ke hequr 11 172 mësuesve të drejtën e fituar deri në qershor të vitit 2024, dhe pas presionit të opozitës, të sindikatës ta sjellësh nismën gjysmake.  Është e vërtetë: kam kërkuar dhe e rikërkoj në ligjin “Për arsimin e lartë”, sepse duhet rregulluar njëherë e mirë; duhet rregulluar që t’u japim mundësinë e avancimit në karrierë dhe garancinë e pagës. Nisma juaj është gjysmake, se keni hallin e parave të buxhetit të shtetit, se doni t’i vidhni dhe jo t’i bëni paga për mësuesit, sepse, po të kishit merakun e mësuesve, e kishit sjellë të plotë, e kishit sjellë te ligji “Për arsimin e lartë”, siç e solla unë, dhe nuk sillni një nismë të vjedhur, të përçudnuar dhe tani thoni: hajdeni të votoni ju se si t’ua marrim 5 mijë mësuesve të tjerë atë të drejtë, që e kishin fituar para vitit 2024! 

Ndaj, zonja Kushi, meqenëse je edhe nënkryetare e Komisionit për Edukimin, diskutoni atje edhe për pronësinë intelektuale dhe t’ju vijë turp që merrni dhe plagjiaturoni ligjet e opozitës. 

Faleminderit! 

The post Ndërhyrje për procedurë në Kuvend dhe replikë me deputeten e PS Evis Kushi në / 5 Mars 2026 appeared first on Ina Zhupa.

Projektligji i ardhur në datën 21 nëntor nisi si një propozim nga ana ime, i risjellë kur do të diskutohej në Komisionin për Edukimin, kur duhej ta votonin kundër, më 2 shkurt zonja Kushi ka propozuar të njëjtën gjë dhe, pardje, në seancën e zhvilluar në Komisionin e Ligjeve, ministria ka sjellë disa ndryshime ligjore. Është ndërprerë mbledhja e Komisionit të Ligjeve për të kuptuar se si t’i fusnin këto ndryshime ligjore, se nuk ishte parë ndonjëherë të sillte ministria ndryshime në një seancë komisioni, pasi ministria nuk ka të njëjtat të drejta si deputeti (nëse do të sillte një projektligj, duhej ta fuste në procedurë parlamentare). Më pas, ato që propozoi ministria, i mori dhe i shkroi zonja Kushi. Pra, dy herë plagjiaturë në projektligjin që propozon dhe asgjë nuk e ka të vetën nga ato çfarë thotë.  Për sa i përket pagës së kategorisë së mësuesve, kjo është një çështje që e ka ndërtuar, nga fillimi në fund, mazhoranca. Ata e merrnin pagën e kategorisë të barabartë të gjithë, si ata para sistemit të Bolonjës, si ata pas sistemit të Bolonjës. Ishte kjo mazhorancë, ministrja Ogerta Manastirliu, e cila me një VKM ua hoqi duke u thënë: ju nuk jeni të barabartë me kolegët tuaj, edhe pse keni vite në sistem, edhe pse jepni në të njëjtat klasa, edhe pse jepni të njëjtën lëndë, edhe pse jeni më të vjetrit në sistem (duhet thënë se, ata të cilët e kanë këtë problem, janë edhe më të vjetrit në sistem, pasi kanë mbaruar para sistemit të Bolonjës). Pra, problemin ua krijuat vetë.  

Zonja Kumbaro tha një mashtrim: ne nuk e rregullonim dot këtë gjë që bëmë vetë, sepse ju ishit në Gjykatën Kushtetuese. Absolutisht, nuk ka lidhje fare!  

E para, kur ishte në Gjykatën Kushtetuese, ishte një VKM. Nuk e ndalonte asgjë të fillonte një proces ligjor, sepse ishte VKM-ja të cilën edhe mund ta kishin tërhequr. I kujtoj qeverisë se për një padi që kanë në Gjykatën Kushtetuese për mbylljen e TikTok-ut, ndërkohë që e shqyrtonte Gjykata Kushtetuese, nxorën një vendim tjetër që ta rihapnin dhe nuk i ndaloi fare gjykimi në Gjykatën Kushtetuese. Pra, nuk ishte kjo.  

Së dyti, mbaroi gjykimi në Gjykatën Kushtetuese, në korrik, dhe prapë nuk morën asnjë masë. I detyruam ne, deputetët e opozitës (ishte propozimi im që në nëntor), dhe u kujtuan në shkurt të vitit 2026 të sillnin propozimin e vjedhur, me emrin e zonjës Kushi.  

Për të garantuar të gjithë mësuesit dhe për t’u thënë se kjo është një betejë juaja, betejë e sindikatave dhe e deputetëve të opozitës, imponuam mazhorancën që padrejtësinë që u bëri, ta korrigjojë tani, por në mënyrë të pjesshme. Pse i them këto? Sepse plagjiatura të lë gjithmonë të mangët dhe plagjiatura e zonjës Kushi e ka lënë të mangët propozimin, pra ka sjellë një propozim gjysmak. Propozimi im ishte në ligjin për arsimin e lartë dhe ishte i plotë, për të garantuar që të përfitonin të gjithë.  

Në propozimin që keni sjellë ju sot dhe na kërkoni ta votojmë, keni disa probleme.  Së pari, ju kërkoni të përfitojnë vetëm ata që janë punësuar deri në vitin 2017 (pra, para vitit 2017). A ma sqaroni dot se çfarë ndodh kur një mësues, i cili ka mbaruar para sistemit të Bolonjës dhe, për shkak të mbylljes së klasave, ngelet pa punë (sepse ju e dini që shpopullimi ka bërë që shumë klasa të mbyllen dhe shumë mësues të dalin pa punë, ndërkohë që duhej të ishin në punë, dhe ngelen në sistem si mësues, me një kontratë të përkohshme ose si mësues në kërkim të punës), pra kur del nga sistemi dhe rifutet në sistem me një datë tjetër punësimi, sepse do të punësohet në vitin 2026, nuk e përfiton më atë, sepse data e punësimit është e ndryshme nga ajo e mëparshmja? Kjo është njëra kategori. Dhe janë të shumta klasat që mbyllen tani, sepse shpopullimi është drama më e madhe që ka Shqipëria. 

Po në rast se një mësues kalon, bie fjala, nga një ZAV e Elbasanit, në ZAV-në e Durrësit, për shkak të transferimit të tij edhe për shkaqe familjare, edhe për shkaqe vendbanimi e të tjera, dhe data e re e kontratës, e ndërtuar në ZAV-në e re, do të jetë një datë e mëpasshme nga viti 2017, pra mund të jetë 2026-a, 2025-a apo kur e ka bërë, pse nuk mund të përfitojë?  

Keni vendosur me kontratë të plotë çdo mësues (nuk di ku e keni gjetur këtë), pra çdo mësues që ka mbaruar sistemin para Bolonjës, do të ekuivalentohet, nuk ka rëndësi, me kontratë të pjesshme, me kontratë të plotë, të përkohshme, para 2017-s, pas orës 10, para orës 10…! Këto bëhen vetëm që ju t’ua ngushtoni gamën e të drejtave, që mësuesit shqiptarë i kanë fituar.  

Ndaj edhe ky projektligj, ndryshe nga sa korrigjonte projektligji im, nga 11 172 të prekur, korrigjon vetëm 6000, duke i lënë përsëri 5000 mësues pa ua rregulluar problematikën. Pse? Sepse janë mësues që kanë këtë problemin e kontratave, janë mësues të punësuar pas vitit 2017 për problematika të ndryshme, janë edhe të gjithë ata që shërbejnë në kopshte dhe në çerdhe, të cilët, po ashtu, janë mësues të arsimit parauniversitar, me diplomë para sistemit të Bolonjës, por ju nuk i përfshini. Nuk i përfshini, se harxhoni paratë e buxhetit të shtetit, se doni t’i vidhni paratë dhe nuk doni t’i çoni te mësuesit!  

Të gjitha këto janë bërë qëllimisht, për ta ngushtuar dhe për të përfituar sa më pak mësues apo për t’u hedhur hi syve e për t’u thënë: ja, ne jua miratuam; për të qetësuar gjysmën e kategorisë së prekur, për të bërë atë urimin fasadë: gëzuar 7 Marsin! Këtë urim mësuesit e duan me dinjitet, me ligje që u shërbejnë dhe me paga që reflektojnë punën dhe vështirësinë e tyre! Mbarimi i shkollës para sistemit të Bolonjës dhe mbarimi i shkollës pas sisstemit të Bolonjës nuk duhet të jetë as penalizim për avancimin e tyre në karrierë, por, përsëri, duke e korrigjuar te ligji për arsimin parauniversitar, ju nuk e zgjidhni këtë problem, sepse secili nga ata nuk mund të ketë të drejta të barabarta me ata që kanë mbaruar pas sistemit të Bolonjës, se ju nuk i quani të shkolluar! 

Por ç’faj ka mësuesi, që, kur është shkolluar dhe kur ka mbaruar shkollën, ka qenë ky sistem?! Ç’faj ka mësuesi, a është kurrikula e njëjtë apo aftësia e njëjtë? Kjo është detyra juaj, detyra e universiteteve, për të thënë: po, kjo ekuivalentohet, sepse aftësitë janë të njëjta. 

Sot u keni krijuar probleme mësuesve për licensën dhe përsëri do të vijmë këtu dhe do të merremi gjerë e gjatë, do të detyrohemi ne të bëjmë një betejë 1 vit, 1 vit e gjysmë, që të vini ju pastaj dhe të thoni: e kemi bërë gabim! Korrigjojeni që sot, sepse janë mësuesit që kanë më shumë vite eksperiencë dhe punojnë në profesionin e tyre me shumë dinjitet, por ju i nxirrni të skualifikuar dhe u thoni: shkoni jepni provim dhe shkoni paguani para për licensën!  

Pra, ju nuk e keni vullnetin t’u shërbeni mësuesve. Edhe kur sillni një projektligj të detyruar nga opozita, përsëri e keni gjysmak dhe jo për t’u garantuar mësuesve të drejtën e avancimit profesional, kualifikimet e mëtejshme dhe një pagë të drejtë dhe dinjitoze, por për t’i futur përsëri në një spirale përplasjesh me ZVAtë dhe ministrinë, teksa një koleg e përfiton dhe një tjetër jo, teksa disa trajtohen si të nënës dhe të tjerët si të njerkës! (Bie gongu.)  

Të paktën, pranojini amendamentet për ta kthyer ligjin në më funksional, sepse ky që keni sjellë vetëm nder dhe dinjitet nuk u jep mësuesve! Pranojini, sepse është në të mirën e sistemit arsimor, që mësuesit të trajtohen barabar dhe të kenë siguri juridike për atë të drejtë që e kanë fituar dhe ua keni rrëmbyer ju me VKM, me papërgjegjshmëri, duke i lënë 20 muaj pa marrë pagat! 

Për ta mbyllur, korrigjoni edhe pagat e prapambetura, sepse 20 muaj pa marrë pagat është dëm ekonomik, që ua keni bërë atyre mësuesve për një të drejtë që u takonte! Vendosni t’ua jepni ato paga dhe atë dëmshpërblim që u takon për atë që ua keni marrë pa të drejtë!  

Shumë faleminderit! 

The post Fjalim në Kuvendin e Shqipërisë mbi konstatimin si material “kopje” i projektligjit për mesuesit i sjellë nga PS/ 5 Mars 2026 appeared first on Ina Zhupa.

(Ndërhyrje pa mikrofon.) 

Niko Peleshi – Të lutem, mos më komplekso kaq shumë, zoti Bardhi, se s’po e përballoj dot! 

Ina Zhupa – Zoti Kryetar, ju keni fobi nga fjala e opozitës, e keni tmerr; keni numëruar minutat që ne kemi folur në sesionin e kaluar dhe ju ka dhënë vërejtje Kryeministri, se ju tha: ju duhet të jeni vetëm kartonë.  

Edhe pse ka një vendim të Gjykatës 

Kushtetuese që tregon se ky Kuvend ka shkelur të drejtat kushtetuese të deputetëve të opozitës për t’u shprehur, për të diskutuar, për të marrë kohën e nevojshme për ndryshimet në Rregullore, ju vazhdoni të propozoni ndryshime në Rregullore në mënyrë të njëanshme, siç nuk ka ndodhur ndonjëherë më përpara. 

Por cili është thelbi i ndryshimeve? Thelbi i ndryshimeve është të godasësh pikërisht atë për të cilën ju tërhoqi vëmendjen Gjykata Kushtetuese, pikërisht atë për të cilën ju rrëzoi Gjykata Kushtetuese: lirinë e shprehjes së deputetit, hapësirën e deputetit për të thënë të vërtetën, për të thënë hallet e qytetarëve, për të denoncuar korrupsionin qeveritar, për t’ju kërkuar llogari juve. 

Niko Peleshi – Keni diçka për procedurë?

Ina Zhupa – Procedura këtu është që ju propozoni, me vendimmarrje të Grupit Parlamentar të Partisë Socialiste, që koha e deputetëve për të folur të përgjysmohet. 

Niko Peleshi – Ky nuk është diskutim për procedurë. 

Ina Zhupa – Është për procedurë, është vetëm për procedurë. Niko Peleshi – Nuk është për procedurën e ditës së sotme. Do të ktheheni te procedura tani? 

Ina Zhupa – Po, do të kthehem te procedura, se te procedura jam dhe procedura është që t’i tërhiqni ato ndryshime. 

Niko Peleshi – Nuk i kemi sot në rendin e ditës, nuk kam asgjë që lidhet me Rregulloren. 

Ina Zhupa – Nuk i keni sot në rendin e ditës, por e keni ndërmend t’i fusni në rendin e ditës siç ju do qejfi, pa diskutim …  

The post Ndëryrje për procedurë në seancën e Kuvendit të Shqipërisë / 5 Mars 2026 appeared first on Ina Zhupa.

Në fakt, sot është 2 mars, ndaj prisja që socialistët të kërkonin falje, pasi më 11 shtator të vitit 2024 Komisioni i Edukimit, me propozimin e një deputeti socialist, si ish-deputeti i Lezhës, Eduard Ndreca, në atë kohë me mbështetjen e opozitës dhe posaçërisht të dy deputetëve të Lezhës, Agron Gjekmarkaj dhe Kastriot Piroli, e kemi votuar bashkërisht që 2 Marsi i Besëlidhjes së Lezhës të ishte një festë zyrtare, si një simbol që tregon se politika bashkohet kur vjen puna tek identiteti kombëtar, te kujtesa historike e te Heroi ynë Kombëtar Gjergj Kastrioti-Skënderbeu.  

Po çfarë bëri mazhoranca? Në mënyrë të paprecedentë mazhoranca shkeli Rregulloren dhe nuk lejoi të vinte në seancë plenare një projektligj i miratuar në komision, nuk lejoi të votohej 2 Marsi si një festë zyrtare e shqiptarëve. Për juve ka vetëm një Skënderbe, dhe nëse do të lartësonit Skënderbeun, Heroin Kombëtar, sigurisht kishit frikë se mos ia ulnit vlerat Skënderbeut tuaj. Më vjen shumë keq që nuk arritët dot që edhe një konsensus të votuar në komision ta shndërronit në një festë zyrtare. Ideja ishte që kjo gjë do t’i kërkohej edhe Kosovës, që të ishte një ditë e përbashkët për Shqipërinë e për Kosovën. Po për ju ka gjithmonë më shumë rëndësi partia, sesa Shqipëria. 

Në fakt, nesër në Komisionin e Edukimit do të diskutojmë iniciativën për rrogat e mësuesve, për pagesën e kategorisë së mësuesve, që, në fakt, është shembulli konkret se si vazhdoni të bëni propagandë dhe se si e keni të pamundur të votoni iniciativat e opozitës. Tashmë marifeti juaj i ri është: merrni iniciativën e deputetes së opozitës, i vini emrin e deputetes suaj, ndryshoni ligjin nga një ligj te ligji tjetër, dhe merrni atë që do të duhej të ishte rezonanca publike për mësuesit. 

Në fakt, ju jeni ata që keni shkaktuar dëmin, ju jeni ata që i keni lënë që nga qershori i vitit 2024 e deri më sot pa pagesën e kategorisë. Ndryshimin doni ta bëni si një retushim në ligjin e gabuar. 

Nesër ne do të vijmë me amendamente konkrete, dhe nëse e keni vullnetin ta çoni deri në fund, minimalisht kur nuk pranoni dot projektligjin e opozitës, pranoni zgjidhjet e dhëna nga sindikatat, zgjidhjet e dhëna me amendamentet e opozitës, dhe mbajeni emrin e gëzojeni, sepse në fund të ditës do të mbaheni mend si ata që ua hoqët për një vit e gjysmë mësuesve, por që falë betejës së mësuesve, të sindikatës e të opozitës, sot jeni të detyruar të tërhiqeni nga vendimi juaj. 

Shumë faleminderit! 

The post Fjalim në Kuvendin e Shqipërisë mbi gjëndjen e rëndë të infrastrukturës dhe rrugëve në vend / 2 Mars 2026 appeared first on Ina Zhupa.

Shkurtimisht: të gjithë deputetët që kanë shkuar në zonat e tyre elektorale me siguri janë takuar me mësues, të cilët ankohen për heqjen e pagës së kategorisë, si pasojë e një vendimmarrjeje të qeverisë në qershor të vitit 2024. Këta mësues ishin kualifikuar…  (Ndërhyrje pa mikrofon.) 

Zoti Braçe, ju i tërhoqët vëmendje Meritës kur po flisnit, ndërsa kur flasin të tjerët, jeni i pari që ndërhyni. Kështu që, na lini ta prezantojmë.Ata mësues që ishin diplomuar para sistemit të Bolonjës e përfitonin  pagën e kategorisë njësojsi kolegët që ishin diplomuar pas sistemit të Bolonjës.

Shkurtimisht, më lejoni t’u shpjegoj kolegëve si ishte situata dhe si u transformua ajo nga një vendimmarrje e qeverisë dhe e ministres së asaj kohe, zonjës Ogerta Manastirliu.

Kuvendi ka miratuar në vitin 2012 ligjin nr. 69/2012    “Për    arsimin    parauniversitar     në Republikën e Shqipërisë”. Më pas është miratuar vendimi nr. 175 i vitit 2017 i Këshillit të 

Ministrave “Për trajtimin me pagë dhe shtesa të punonjësve mësimorë në arsimin parauniversitar”. Në pikën 3 të asaj VKM-je përcaktohej struktura e pagës mujore, e cila përbëhej nga: paga e grupit; niveli arsimor, që varionte nga 10 mijë lekë deri në 14 mijë lekë; shtesa për vjetërsi pune; shtesa për kualifikim; shtesa e pozicionit. 

Në atë moment të gjithë e merrnin pagën e kategorisë në mënyrë të barabartë, pra, si ata që kishin përfunduar studimet para sistemit të Bolonjës, edhe ata pas sistemit të Bolonjës. Madje arsyetimi ishte i tillë: sipas këtij vendimi punonjësit aktualë mësimorë, edukatorë, të cilët zotërojnë diplomë të ciklit të parë të studimeve baçelor ose të barasvlershme me të, sipas legjislacionit për arsimin e lartë, deri në datën 1 mars të 2017-ës kanë përfituar pagën e grupit në masën 14 mijë lekë.  

Këtyre punonjësve arsimorë, me një të rënë të lapsit, në qershor të vitit 2024 me VKM-në nr. 425 “Për miratimin e strukturës dhe niveleve të pagave të punonjësve arsimorë dhe punonjësve të tjerë jomësimorë në institucionet arsimore dhe në institucionet plotësuese të sistemit arsimor parauniversitar”, iu ul kjo pagë me 4 mijë deri në 5 mijë lekë të rinj. Pra, çdo mësuesi iu hoq çdo muaj 50 mijë lekë të vjetër, ndërkohë që ata vazhdonin të jepnin mësim në të njëjtat klasa, me të njëjtat aftësi pedagogjike si më parë, por trajtoheshin ndryshe nga kolegët e tyre, sepse kështu vendosi qeveria. 

Ndërkohë, ligji “Për arsimin parauniversitar”, ai që citova më sipër, e parashikonte dhe vijon ta parashikojë edhe sot këtë dispozitë. Në nenin 72, pika 6, përcaktohet: personelit mësimdhënës që ka përfunduar studimet universitare në ish-institutet e larta pedagogjike, diploma e përfituar i njihet si arsim i lartë me tetë semestra për efekt page. Gjithashtu, jepeshin edhe sqarimet për mënyrën e ekuivalentimit të kësaj diplome me master shkencash ose me master profesional. 

Sindikata e Bashkuar e Arsimit Shqiptar, por edhe mësuesit shqiptarë dërguan kërkesa dhe ankesa në Ministrinë e Arsimit, e cila asokohe drejtohej nga zonja Ogerta Manastirliu. Ata ndërtuan një urë komunikimi edhe me 

Komisionin e Edukimit, që në atë kohë drejtohej nga unë, ku kërkuan zhvillimin e seancave dëgjimore me ministren për ta zgjidhur këtë situatë. 

Dua ta nënvizoj, kjo situatë u krijua me vullnetin e qeverisë për t’u hequr mësuesve një të drejtë të fituar, nuk erdhi as si pasojë e mungesës ligjore, as për shkak të ndonjë uljeje të profesionalizmit të tyre, as nga ndonjë rregull ndërkombëtar apo europian, por thjesht si pasojë e një vullneti qeveritar për t’u hequr pagesën mësuesve. 

Kërkesat e tyre u injoruan, protestat e tyre u injoruan. Kanë protestuar edhe para Kuvendit, kanë protestuar edhe në rrethet e tyre, kanë protestuar edhe para Ministrisë së Arsimit, por të gjitha u injoruan.  

Dëgjesat që bëri Komisioni i Edukimit jo vetëm që nuk sollën zgjidhje, por ministrja e asaj kohe, Ogerta Manastirliu (ftoj kolegët të shikojnë procesverbalin e datës 12.11.2024 të Komisionit të Edukimit), ka ardhur dhe ka mbajtur këtë qëndrim, që ka bërë shumë mirë që ua ka hequr pagesën e kategorisë, sepse kështu mësuesit barazoheshin me nëpunësit e administratës civile. Në këtë mënyrë e mbronte këtë padrejtësi ndaj mësuesve, duke thënë: ne tani u kemi rritur pagat e mësuesve. Ndërkohë, rritja e pagave ishte totalisht në raport të zhdrejtë me fuqinë blerëse që kishin mësuesit dhe me atë që nuk kishin marrë për 13 vjet nga qeveria shqiptare. Në krahasim me atë që merrnin, nuk ishte ndonjë favor i madh për mësuesit, por, përsëri, edhe me këtë rritje, që thoshte qeveria, ata nuk trajtoheshin në mënyrë të barabartë me kolegët e tyre. Nëse një koleg i tyre, që jepte në të njëjtat klasa paralele të njëjtën lëndë, merrte 850 mijë lekë të vjetër, ai ose ajo merrte 800 mijë lekë të vjetër. Pra, u kishte ulur, pikërisht, pagesën e kategorisë. Kjo gjë atyre u ndikonte jo vetëm në masën e pagës mujore, sepse janë shumë të rëndësishme për çdo shqiptar 50 mijë lekë në muaj, sidomos për mësuesit, por u ndikonte drejtpërdrejt edhe në masën e pensionit që do të merrnin. 

Kini parasysh që këta janë njerëzit më të vjetër në sistem, prandaj janë shkolluar përpara sistemit Bolonjës, shumë prej tyre mund të jenë më me eksperiencë në sistem, madje një pjesë e tyre janë edhe në prag të pensionit; vitet e fundit merreshin si referencë për masën e pensionit. Pra, ti jo vetëm i dëmtove në pagën që merrnin në mënyrë të përmuajshme, por i dëmtove përjetësisht edhe në masën e pensionit, që më pas do të jetë pension referencial për çdo rritje, për çdo indeksim që do t’i bëhet masës së pensionit. 

Të vënë përpara kësaj situate, Sindikata e Bashkuar e Arsimit Shqiptar, me përfaqësuese kryetaren, zonjën Alma Lame, e mbështetur edhe nga opozita, ka shkuar në Gjykatën Kushtetuese për të kërkuar shfuqizimin e VKM-së, pasi binte në kundërshtim me ligjin e arsimit parauniversitar. E nënvizoj këtë fakt, sepse qeveria vazhdoi dhe insistoi, shkoi si palë kundër mësuesve në Gjykatën Kushtetuese, e bindur për t’ua marrë domosdoshmërisht ato para mësuesve shqiptarë.  

U zhvillua seanca dhe vendimmarrja e Gjykatës Kushtetuese ishte 4 me 4. 4 me 4 ka qenë luksi i qeverisë dhe i mazhorancës, sepse nuk kanë pasur ndonjëherë shqetësim me 4 me 4, derisa ndodhi çështja “Balluku”, sepse 4 me 4 do të thoshte që rrinin në fuqi ligjet e Parlamentit, VKM-të e qeverisë, dhe ju ishit shumë të lumtur. Edhe në këtë rast, po ashtu, ishit shumë të lumtur që e fituat betejën kundër mësuesve dhe qëndronte në fuqi VKM-ja juaj. Në arsyetimin e Gjykatës Kushtetuese ata i ftonin mësuesit që të advokonin te ligjvënësi, në rastin tonë te ne, për të ndryshuar ligjin e arsimit të lartë dhe për t’i lejuar ata që diploma e tyre jo vetëm të ishte e barasvlershme me sistemin pas Bolonjës, por edhe të kishin mundësi të avanconin në karrierën e tyre dhe të trajtoheshin nga sistemi në mënyrë të barabartë. Pikërisht, këtë rrugë zgjodhën dhe, në konsultim me mua, kemi ardhur te ky projektligj. 

Ky projektligj ndryshon vetëm një nen në ligjin e arsimit të lartë dhe të kërkimit shkencor në Republikën e Shqipërisë, nenin 124, ku pas pikës 4, shtohet pika 4/1 me këtë përmbajtje, që po jua citoj: “Personat e diplomuar në programe studimi të përfunduara para përshtatjes së tyre, sipas parimit të Bolonjës, trajtohen nga ana administrative-financiare sipas nivelit të diplomës që kanë pasur para hyrjes në fuqi të këtij ligji. Kjo përfshin diplomat e programeve 3-vjeçare, 6 semestra, që njihen si baçelor dhe master profesional me 60 apo 90 kredite, të cilat vazhdojnë të njihen dhe të trajtohen si diploma të nivelit të dytë për qëllime klasifikimi, pagese dhe avancimi në karrierë.”  

Kjo, në fakt, do ta zgjidhte përfundimisht çështjen. Për këtë arsye është zgjedhur nga vetë mësuesit, përmes sindikatës së tyre, që të përdoret ligji i arsimit të lartë, sepse do ta zgjidhte përfundimisht një problem të krijuar jo për fajin e tyre. 

Në Shqipëri ai ka qenë sistemi arsimor; ato kanë qenë kurrikulat më të avancuara për kohën, para sistemit të Bolonjës, dhe mësuesit nuk mund të konsiderohen të ndryshëm, sepse kjo nuk ka ndodhur për faj të tyre, sikur nuk kanë përfunduar ciklet e plota, ndërkohë që kanë marrë arsimin e lartë më të mirë për kohën. 

Në këtë aspekt, ne mendojmë dhe gjykojmë se, duke u rregulluar ky ligj, ata që sot janë të privuar nga trajtimi financiar dhe avancimi në karrierë, të kenë mundësi të trajtohen njësoj si kolegët e tyre. Në këtë mënyrë ne adresojmë një shqetësim të drejtpërdrejtë të mësuesve, që nuk janë pak, por 1/3-ta e atyre që janë në sistemin parauniversitar, duke marrë parasysh që bëhet fjalë për rreth 30 mijë mësues, nga të cilët 11 mijë e 172 janë prekur nga pagesa e kategorisë. 

Në këtë mënyrë ne do të vlerësonim eksperiencën e tyre të gjatë në edukimin e brezave, kontributin e tyre të çmuar profesional në sistemin arsimor, si dhe do t’i garantonim ata që do të trajtohen në mënyrë të barabartë, jo diskriminuese, me meritokraci dhe do të kishin mundësi të kontribuonin në sistem me dinjitetin që u takon. Kini parasysh se, në të kundërt, nëse ndërhyhet ashtu siç parashikon nisma paralele e zonjës Kushi, dhe më lejoni të ndalem këtu për disa sekonda… Grupi i Partisë Socialiste me sa duket ka marrë vendim që të mos miratojë asnjë nismë të opozitës, çfarëdo nisme që ajo të paraqesë. Këtë ma pohoi me gojën e tij kryetari i Komisionit të Ligjeve, të cilin e vlerësoj për sinqeritetin, pasi ishte i vetmi që u tregua i sinqertë. Ai tha se nuk kishte nevojë për debat në komision dhe nuk lejoi zhvillimin e një diskutimi (në fakt, unë u revoltova pse nuk e lejoi zhvillimin e një debati në Komisionin e Ligjeve), dhe u shpreh se nuk kemi nevojë për debat, sepse projektligji është shumë i mirë, por ne do ta bëjmë vetë. 

Në fakt, sinqeriteti i tij e dëmton parlamentarizmin, sepse parlamentarizmi nuk ka kuptim nëse ligjet i harton vetëm mazhoranca. Atëherë çfarë kuptimi ka e drejta e deputetit për të propozuar ligje? Por të paktën nuk pati hipokrizinë e kolegeve Manastirliu dhe Kushi, të cilat u përpoqën të shpiknin çdolloj gjëje për të thënë se ky projektligj nuk vlente. Atyre u binte në kundërshtim fjalia e parë me të dytën me atë që thoshin. Si përfundim, rezultati ishte i njëjtë me atë të Komisionit të Ligjeve, por nivelet i sinqeritetit ishin të ndryshme. 

Kështu që, në këtë aspekt, mos kini asnjë kompleks për të votuar një projektligj të deputetëve të opozitës, sepse është një projektligj që u shërben mësuesve, sistemit arsimor, por edhe fëmijëve. Mësuesit e motivuar dhe me një trajtim financiar më dinjitoz, janë mësuesit që krijojnë një klimë më të mirë dhe më motivuese për nxënësit shqiptarë. 

Në qoftë se ju sot tërhiqeni dhe dëshironi ta ndryshoni një vendim që e keni marrë vetë, kjo përsëri është meritë e mësuesve dhe meritë e opozitës, sepse, nëse ju do t’ua donit të mirën atyre, nuk do të ishim në këtë situatë, ku na është dashur të kalojmë nëpër protesta, kërkesa, Gjykatë Kushtetuese dhe tani të paraqesim një projektligj, vetëm për shkak të vullnetit tuaj për t’u hequr mësuesve një të drejtë të fituar. Për ta mbyllur prezantimin, ju them me bindje të plotë se projektligji i propozuar synon të mishërojë edhe parimet e Kushtetutës së një shteti të së drejtës dhe të sigurisë juridike, duke siguruar moscenimin e të drejtave të fituara nga profesionistët e sistemit parauniversitar. Ata profesionistë do të marrin një të drejtë që e kishin fituar më parë. Do të ishte në dinjitetin tuaj jo vetëm që ta votoni, por të përgatisni edhe një VKM, që përcakton se nga qershori e deri tani, kohë që ata nuk kanë marrë pagesën e kategorisë, të ripaguhen, në mënyrë që të mos mbajnë kostot e vendimmarrjeve tuaja të pakonsultuara, vendimmarrjeve tuaja antimësues dhe vendimmarrjeve tuaja që nuk i kanë shërbyer kurrë sistemit arsimor në Shqipëri. Ky është rasti që të mbani një qëndrim, duke filluar që sot, duke votuar pro mësuesve. Nuk votoni pro meje; votoni pro mësuesve, votoni pro një sistemi arsimor, që i shërben me dinjitet mësuesve më të vjetër në sistem. 

Shumë faleminderit! 

The post Fjalim në Kuvend, prezantimi i nismës ligjore për mesuesit, ligji “Për    arsimin    parauniversitar     në Republikën e Shqipërisë”./ 19 Shkurt 2026 appeared first on Ina Zhupa.

Fillimisht prisja nga ministri të mbante një qëndrim në lidhje me projektligjin, meqenëse është një projektligj në fushën e përgjegjësisë së ministrit. 

Sa i përket projektit TID, zoti ministër, e kemi diskutuar edhe në interpelancë, edhe në dëgjesën që kemi pasur në komision dhe keni thënë që do ta rishikoni projektin. Nuk e keni rishikuar. Keni shkuar te banorët për t’u thënë të pranojnë kushtet e dorëzimit dhe diskutimi me banorët ka qenë: hajt t’u japim diçka më shumë! 

Ndërkohë, aty bëhet fjalë pikërisht për identitetin e qytetit të Durrësit, bëhet fjalë për shtëpi në të cilat nuk është vënë një gozhdë, zoti Gonxhe, sepse ishin në zonë konservimi. Pra, ato shtëpi, ku nuk lejohej të vihej një gozhdë pa lejen e qeverisë dhe të Ministrisë, sot do të shemben. Ma shpjegoni dot se çfarë logjike ka kjo, që ato nuk paskan vlera! Si paskan pasur vlera këta 200 vjetët e fundit dhe nuk kanë tani?! Ato nuk janë shtëpi që u ndërtuan tani, nuk janë banesa që nuk përfaqësojnë asgjë, janë identiteti dhe historia e Durrësit. Procesi sigurisht nuk është bërë, sepse unë kam shkresën nga Ministria juaj ku më thoni se keni konsultuar veten, keni konsultuar muzeun, keni konsultuar Institutin që keni në varësi, keni konsultuar Shoqatën e të Verbërve, por nuk është ky procesi i konsultimit. Kur prishen banesat, konsultohen personalisht ata që janë të prekur nga projekti, thuhet në një ligj tjetër që lidhet me shpronësimet për interes publik. Siç i gjetët njerëzit për t’u çuar letrën në shtëpi se do të shembet shtëpia, t’i kishit gjetur ata për t’u konsultuar. Nuk ka ndodhur në ndonjë vend normal apo në ndonjë qytet normal që Bashkia të mos bëjë një plan të përgjithshëm dhe të detajuar vendor, se si do të ndërtohet dhe do të zhvillohet qyteti, por të jetë një organizatë, të jetë një OJF që vendos se si do të organizohet qyteti. Këtë i keni bërë Shqipërisë ju.  

(Bie gongu.) 

Niko Peleshi – Ta mbarojë fjalinë. Ina Zhupa –  Ju e keni përçudnuar çdo gjë dhe çdo ligj, ndaj do t’ju lutesha në emër të banorëve, por edhe në emër të Komisionit të Kulturës, meqenëse aty ka identitet, kulturë dhe histori, ta rishikoni projektin dhe ta bëni atë pikërisht siç i keni vënë emrin, që të shërbejë për turizmin, sepse kështu nuk u shërben fare as turizmit, as Durrësit, as banorëve dhe as interesit publik. 

Faleminderit! 

The post Replikë në Kuvendin e Shqipërisë me ministrin Blendi Gonxhe për projektin TID të AADF-s në Durrës / 19 Shkurt 2026 appeared first on Ina Zhupa.

 I nderuar koleg, kur e merr fjalën për trashëgiminë kulturore dhe bën politikën e partisë, që këtu e kupton qartësisht se partia është mbi Shqipërinë. Ju bëra një thirrje që, të paktën për trashëgiminë kulturore, të diskutojmë, duke pasur interesin e Shqipërisë dhe jo interesin e përditshëm të partisë politike.Për sa i përket antiamerikanizmit tim që e shpalli zoti Mile, ta dish, zoti Mile, se unë bazohem në parimet më të larta të Konventës së Parisit, në parimet më të larta të vetë Kushtetutës së SHBA-së dhe në modelin që ndjekin Shtetet e Bashkuara të Amerikës për menaxhimin e parqeve të tyre kombëtare. Vetë Kongresi amerikan është duke e hetuar AADF-në në lidhje me pagesat e taksave, por kjo është një çështje e tyre. Mua nuk më intereson nëse fondacionet që e marrin, janë amerikane, janë turke, janë greke, janë italiane, janë spanjolle, por mua më intereson që Kushtetuta e vendit tim të respektohet. Pavarësisht kombësisë, interesit të fondacioneve apo të klientëve të pushtetit, ne duhet të jemi gjithmonë mazhoritarë dhe garantë për trashëgiminë tonë kulturore. 

Në lidhje me protestën e opozitës, patjetër që do të jetë më e madhe se protesta e shkuar, patjetër që do të jetë kundër korrupsionit të qeverisë suaj dhe patjetër që do të jetë sa herë që ju të shkelni Kushtetutën e Republikës së Shqipërisë dhe të bëheni mburojë për krimin, mburojë për korrupsionin, siç po bëheni. Shqetësohuni më shumë për atë që thotë kryetari i Komisionit të Jashtëm, që është testi i rëndësishëm, për imunitetin e zëvendëskryeministres, sesa për protestat, të cilat janë mjetet demokratike të një vendi normal. 

Faleminderit! 

The post Replikë në Kuvendin e Shqipërisë ndaj deputetes PS -Sara Mile mbi protesten e opozitës / 19 shkurt 2026 appeared first on Ina Zhupa.

Republikës së Shqipërisë si mall tregtar. 

Jam shumë e lumtur që erdhi zoti Gonxhja, i cili ka qenë në Komisionin e Kulturës dhe ka mbajtur një qëndrim, duke thënë: jam dakord që shteti duhet të jetë garant dhe duhet të jetë mazhoritar në fondacionet publike për menaxhimin e trashëgimisë kulturore. Atë që e ka thënë me fjalë atje, uroj t’ua thotë sot kolegëve të mazhorancës që të votojnë pro projektligjit, që të jenë gjithmonë fondacione publike, ku Ministria e Kulturës të ketë minimalisht 51% dhe privati të ketë pjesën tjetër.  

Të dëgjojmë këtu retorikë sikur po flasim për ndonjë fushë të sipërmarrjes tregtare, që ne po ndalojmë privatin dhe ne po bëhemi pengesë, kjo është pastaj të vësh duart në kokë! Kushtetuta ka vendosur disa limite, dhe nuk mund të thuash: hajdeni ta japim flamurin me koncesion, se mbase na bën një flamur më të bukur Versace; hajdeni t’ia japim Policinë e Shtetit privatit, se mbase kanë kapacitet për të bërë reklama më të bukura. Pra, ka disa limite që i ka vendosur Kushtetuta. Trashëgimia dhe identiteti është një nga limitet që ka vendosur Kushtetuta. 

Të nderuar kolegë, nëse i keni fjalimet apo qasjen që kontrata, që kanë vendosur në rastin e caktuar Butrintin apo tjetrin, është më e rëndësishme dhe, përderisa neve nuk na ka dalë një problem te kontrata, jemi të lumtur, unë mendoj se nuk mund të ekzistojë asnjë kontratë mbi Kushtetutën, edhe ligji vetë nuk është mbi Kushtetutën. Ndaj ju ftoj që ta çojmë këtë ligj dhe ta bëjmë kushtetues, sepse do të ishte në nderin e secilit prej kolegëve.  

The post Fjala në Kuvend, ndërhyrje për procedurë dhe sqarim në lidhje me nismën ligjore / 19 shkurt 2026 appeared first on Ina Zhupa.