Deputete e Partisë Demokratike në Kuvendin e Shqipërsië | 2021 - 2025
Dëgjova me shumë vëmendje përgjigjet e ministres. E kam dëgjuar në komisione dhe do të vazhdoj ta dëgjoj në të gjitha komisionet dhe sigurisht do të vazhdoj ta kundërshtoj me fakte. Kishit bërë një postim që thuhet nuk është në shitje Butrinti. Në fakt, vetë e keni quajtur për shitje, sepse ne nuk jemi akuzuar ndonjëherë që po e shisni, por që po e jepni falas me koncesion për 10 vjet një fondacioni privat të huaj.
Ju, zonja Ministre, ndryshe nga përgjigjet që jepni, jeni një anëtare e bordi dhe bordi ka 5 anëtarë, nder të cilët asnjë anëtarë tjetre nuk është punonjës i shtetit apo i Ministrisë së Kulturës, siç thoni ju, por janë 4 persona të tjerë, dy prezent dhe dy të tjerë joprezent. Për sa i përket asaj që vuri në dukje edhe kryetari i Komisionit, por që thatë edhe ju, ky nuk është një debat i majtë apo i djathtë, ky nuk është një debat sa e duam apo sa e kemi dashur Auron Taren në të kaluarën, ky është një debat sot sa patriotë jemi dhe sa e duam pasurinë kombëtare shqiptare përkundrejt atyre që duan ta falin, ta japin. këtu bashkohemi të gjithë, pavarësisht se jemi të majtë dhe të djathtë.
Thoni që keni bërë dëgjesa. Po, në fakt ministrja para jush ka bërë dëgjesa me ata që ka në varësi, me ata që u jep rrogën dhe kur ka shkuar Auron Tare për të marrë pjesë në këto dëgjesa ia kanë hequr fjalën dhe kanë ndaluar mbledhjen, sepse nuk donin një format tjetër, përveç atyre që paguheshin nga ministria për të thënë ato që i pëlqente ministres.
tyre që paguheshin nga ministria për të thënë ato që i pëlqente ministres. Në listën që ju citoni me 80 ekspertë, në planin e menaxhimit të Butrintit, nuk është pyetur asnjë ekspert shqiptar dhe asnjë arkeolog shqiptar. Kjo që keni vënë ju si listë, listën e punonjësve tuaj të ministrisë, agjencive, Bashkisë Sarandë, Bashkisë Konispol keni vënë kryetarë komunash, të cilët më kanë kontaktuar, duke thënë që emri i tyre është kot aty, si: Vasil Xhai, nuk ka dhënë asnjë kontribut, ka një specialist të nderuar pyjesh, si: Kristo Kauri, i cili po ashtu thotë që unë nuk kam firmosur asgjë dhe e kam emrin aty.
Sot kishim një reagim nga Shoqata e Guidave, të cilën ju nuk e keni pyetur, por keni pyetur shoqatën e Boy Scouts, a e kuptoni sa interesante është?! Pra, për Butrintin, i cili guidat i ka shumë të rëndësishme ju keni pyetur Shoqatën e Boy Scouts-ve. Pra, Boy Scouts ka lidhje, ndërsa Shoqata e Guidave nuk ka lidhje.
Është po aq interesante kur ju thoni që Giora Solar është marrë parasysh. Në fakt, vetë ai thotë në intervistë që plani i bërë vetëm me ekspertë shqiptarë, i paguar nga AADF-ja, nuk u publikua kurrë dhe nuk u bë kurrë dokument zyrtar, sepse nuk i pëlqeu atij që e pagoi. Kjo është intervistë publike e zotit Solar. Unë, personalisht, nuk e njoh, ndoshta ju e njohin, por unë e dëgjoj në aktet e tij publike si personalitet. A janë emra të rëndësishëm?! Sigurisht që janë emra të rëndësishëm. Ju keni thënë që keni pyetur Universitetin e Tiranës, zotin Lorenc Bejko, pra, atë që është drejtori i Fondacionit, a e keni pyetur a është dakord për këtë Fondacion. Zoti Neritan Ceka më ka dhënë një porosi, që besoj se jeni të informuar. Zoti Lorenc Bejko ka marrë një fond 500 mijë euro për të gërmuar një dumë në Korçe, si ekspert, dhe e ka regjistruar si personale këtë pronë dhe zoti Neritan Ceka ka sjellë edhe dokumentet, të cilat mund t’jua vë në dispozicion, nëse nuk i keni. Dokumentet tregojnë sesi regjistrojnë si pronë personale një zbulim që ka bërë me fonde dhe që është trashëgimi kulturore shqiptare. Imagjinoni ju sikur zoti Neritan, apo babai i tij Hasani, t’i regjistronte si personale ato që do të bulonte. A rrezikojmë ne që zoti Bejko, me të njëjtin model zbulimet e Butrintit do t’i regjistrojë si personale të tij apo të Hoxhisit?!
Në literaturën që ju keni prezantuar të planit të menaxhimit, përveçse nuk gjejmë asnjë libër të arkeologëve shqiptarë, që është çmenduri, të bësh një plan për Butrintin dhe të mos kesh një libër të Neritan Cekës, apo të kujtdo tjetër që është mare me të, keni vënë si literaturë libra me përralla dhe, jo vetëm kaq, por librat, të nuk kanë as vitin e botimit dhe asgjë, janë librat “Shenjtë dhe mëkatar”, literaturë e shkëlqyer besoj për menaxhimin. Ky plani juaj i famshëm i menaxhimit, përveçse ka një literaturë, që, sinqerisht, në studentët do të sillnin një literaturë të tillë do të ngelnin…
(Ndërhyrje pa mikrofon)
Për të kuptuar seriozitetin, me të cilin do të menaxhoni për 10 vjetët e ardhshëm Butrintin. Literatura juaj është një literaturë pa asnjë studiues shqiptarë, që të jetë arkeolog. Nuk them të merrni shqiptarë nga kombësia, por nga profesionaliteti. Prandaj, unë kërkoj që të na vini në dispozicion listën e ekspertëve shqiptarë, që kanë shkruar pjesët e planit të menaxhimit sipas secilit komponent dhe sipas secilit kapitull. Kush kanë qenë arkeologët shqiptarë, që kanë marrë pjesë në hartimin e planit të menaxhimit nga kompania britanike Prince&Pearse? Zonja ministre, a janë konsultuar drejtuesit e Butrintit? Në dijeninë time, nuk janë konsultuar, por, nëse ju i keni konsultuar, na vini në dispozicion dokumentacionet që vërtetojnë atë që thoni ju. Kuptohet, i keni institucione në varësi dhe nuk është çudi që me një telefonatë ju të thoni që i konsultuam, por duhet të na vini dokumentet në dispozicion.
Ekziston një vendim i Këshillit të Ministrave, i pandryshuar sigurisht, i vitit 2002, numër 176, i cili tregon se kush e bën administrimin e qytetit antik të Butrintit. Për administrimin ka një bord, i cili është në fuqi, për aq kohë sa nuk është ndryshuar VKM-ja. A është marrë bordi dhe a ka qenë ky bord pjesë e diskutimit dhe pse nuk është ky bord ndër firmëtarët e marrëveshjes së Butrintit dhe pse duhet të kalojmë nga ky bord te një bord tjetër privat, meqenëse ju thoni se sipas jush e ka shteti? Të gjitha i ka shteti, shtojini këtij bordi edhe ndonjë përfaqësuese tjetër dhe u bë një bord publik, shto edhe një përfaqësues donator, nëse ke, dhe nuk krijohet një bord i ri. Ju doni të na hidhni hi syve dhe të na thoni që është publike një gjë që është private dhe të na merrni këtu shembuj të fondacioneve të tjera nëpër botë që nuk janë private, janë totalisht publike. Siç është bordi që kemi në fuqi mund t’i shtoni edhe një anëtar tjetër, që mund të ishte një anëtar nga AADF-ja nuk do të kishte asnjë problem, do të kishte bord shtetërore, shtohet edhe një anëtar tjetër, sepse është filantrop dhe do të japë para, por ju nuk doni, pasi ia jepni të gjithin këtij Fondacioni të ri që është krijuar, në të cilin ju jeni një anëtar dhe nominale, me emër dhe jo me funksion, sigurisht besoj që do të jetë edhe me funksion.
Nga ana tjetër, në planin e biznesit keni kapituj të tërë me çështje që nuk kanë lidhje fare me Butrintin. Ndërkohë thoni: dhe citoj me numër faqesh për të qenë e saktë, faqja 37 e planit të biznesit, “Thelbi duhet të qëndrojë te fitimi ekonomik…. për sa i përket individit, komunitetit, shoqërisë.” Pra, thelbi i asaj që ju ndërtoni për Butrintin, ju e keni fshehur në të gjitha seancat e komisioneve, por Kryeministri e pranoi, është fitimi. Në fakt, thelbi nuk duhet të jetë fitimi kur bëhet fjalë për pasurinë kombëtare dhe trashëgiminë kulturore, por duhet të jetë ajo që thotë konventa e Parisit, që juve nuk ju pëlqen. Konventa, të cilët ne e kemi miratuar thotë që shtetet e marrin, sepse ata kanë për detyrë që t’ua transmetojnë brezave të ardhshëm, sepse më e rëndësishme është ajo që u transmetohet brezave të ardhshëm, vlerat e tyre kulturore, më pak vizitorë sesa fitimi dhe bërja e restoranteve, bërja e bareve, qendrave të ndryshme për vizitorët brenda qytetit të Butrintit.
Profesor Apollon Baçe, tha: “Për të ndërtuar unë një tualet në qytetin e Butrintit më kanë ardhur të paktën tri herë nga UNESCO-ja dhe kam çuar dokumente pa fund në UNESCO”, ndërsa ju vini këtu dhe sillni këtë plan voluminoz të fondacionit pa asnjë dokument të vënë në dispozicion të këtij komisioni. Unë kërkoj që të m’i sillni, siç do t’jua bëj edhe me kërkesë zyrtare, dokumentacion se çfarë letërkëmbimi dhe çfarë miratimesh keni marrë ju nga UNESCOja për këtë plan menaxhimi. A ka kaluar në sitë secili nga këto ndërtime që ju parashikoni në planin e ndërtimit? Unë e di që Butrinti nuk ju dhimbet, sepse po t’ju dhimbsej nuk do t’ia kishit hequr 800 hektarë me vendim të Këshillit të Ministrave, të paracaktuar për t’u dhënë Manastiri Resort, me të famshmit AlbStar e të tjerë, dokumente publike. E kuptoj që mund të jetë një koncept shumë më i madh, ku edhe ato resorte, edhe Butrinti brenda bëhen në një gamë të përbashkët për atë që ju e quani zhvillimin e zonës, që, në fakt, ka fitim ekonomik të subjekteve private që i marrin këto, jo fitime të shtetit dhe aq më pak të qytetarëve. Meqenëse thatë që qytetarët e komunitetit do të jenë shumë të lumtur se do të punësohen, qytetarët e komuniteti duhet ta dinë, besoj se e marrin vesh nga ky komision, që përgatiten me planin tuaj të biznesit që të shpronësohen dhe jo vetëm të shpronësohen, por të shpronësohen me një çmim 88 lekë për metër.
(Ndërhyrje pa mikrofon)
Që t’ju sqaroj. Nuk shpronësohesh për diçka që nuk je pronar. Pra, nëse nuk janë pronar, nuk ka nevojë për shpronësim, por nëse janë pronarë, siç janë, sepse këtu parashikohet shpronësimi, atëherë, ne parashikojmë që shteti, për llogari të Fondacionit, do të bëjë shpronësimet. Shteti për llogari të Fondacionit do të shtrojë rrugët, do të bëjë kanalizimet e të tjerë, pra gjithçka që ka nevojë Fondacioni. Ndërkohë që shteti i bën të gjitha këto shumë mirë mund ta mbajë edhe zonën A, që prodhon bileta, pra, kur bën investime mund ta mbajë edhe atë që i sjellë të ardhura. Pse shteti duhet të lëshojë atë që i sjellë të ardhura dhe të mbajë detyrimet, aq më tepër që në kontratë, si në rastin e inceneratorëve dhe çdo gjë tjetër, risqet i merr përsëri shteti. Pra, çdo gjë që është me risk, çdo gjë që është për të paguar para e bën shteti dhe çdo gjë që është me fitim e merr Fondacioni. Domethënë, një mënyrë e shkëlqyer e menaxhimit për të mirën e trashëgimisë kulturore dhe pasurisë kombëtare. Vetëm ju mund ta mendoni që kjo është më e mira.
Për sa i përket asaj që ju mohuat, që në fakt plani nuk e mohon, por është normale që ju do ta mohoni, por këtu është e shkruar, në qoftë se e ndryshoni këtë që është e shkruar… Parashikohet që për bordin, pra, për ju, për anëtarët e bordit, në faqen 71 të planit ët biznesit, shtojca 3.22 thotë: “Fondacioni për menaxhimin e Butrintit do të vërë në dispozicion kosto shtesë, duke përfshirë shpenzime për anëtarët e bordit dhe në vete është angazhimi i stafit, që nuk kanë lidhje në mënyrë të drejtpërdrejtë fizike brenda sitit”. Ju i keni ndarë në dy zëra: shpenzimet për bordin, ku anë 350 mijë euro dhe shpenzimet për stafin mbështetës janë 630 mijë euro, te vlera 630 mijë euro janë 5 punonjës me kohë të plotë, ekspertë ligjorë, llogaritarë e të tjerë. këtu na e shitët sikur kjo që ju do të merrni si honorarë, jo vetëm ju, por edhe anëtarët e tjerë, pra pagesat tuaja na i shitët sikur ishin kosto për fotokopje. Ndërkohë këto nuk janë shpenzime operacionale, sepse ka zë tjetër këtu edhe preh shpenzimet operacionale të ndara këtu.
Nëse e keni pasur për atë dhe e keni shkruar ndryshe, atëherë, e keni shkruar gabim. E zëmë se ju jeni kaq korrektë saqë asnjë nga anëtarët e bordit nuk do të marrë asnjë para shtesë përveç përfitimeve.
Në komisionin e Ekonomisë apo të Jashtëm, ku thatë që kam shumë fantazi, ju thashë që nuk do të jetë çudi kur ne do të paguajmë nga paratë e Butrintit edhe udhëtime jashtë shteti tuajat, të Fondacionit apo të punonjësve, siç na ka ndodhur me rastin e inceneratorëve, ku kemi paguar bileta avioni për administratorët, por ju thatë që nuk është e vërtetë, është fantazi. Në fakt, në atë që shkruan plani juaj në faqen 75 të planit të biznesit parashikohen udhëtime të stafit dhe shpenzimet buxhetore, përshirë ato jashtë shteti. Ky është një zë prej 235 mijë euro. Pra, ato që juve ju duken fantazi, marrëveshjen e kishit sekrete kur unë i aludoja këto, në fakt, janë reale, sepse ne e dimë sesi janë bërë koncesionet në Shqipëri dhe ne e dimë sesi është modeli juaj për të qeverisur, nuk jeni në vitin e parë të qeverisjes, sepse do të kishim atë të dyshimit, il beneficio del dubbio, por ne nuk kemi asnjë dyshim që ju do të veproni siç keni vepruar në 9 vjet, sepse jua kam thënë dhe jua them që Departamenti Amerikan i Shtetit, meqenëse keni Fondacion shqiptaro-amerikan, thotë që korrupsion në Shqipëri është endemik dhe i shtritë në të gjitha degët, sigurisht që ministria juaj nuk është e përjashtuar nga ky raport dhe nga kjo që thotë DASH-i. Sigurisht që DASH-i thotë edhe diçka, ku flitet për ligjet me porosi, ligje të bëra si një kostum për t’ia veshur enkas atij që do ta marrë më pas koncesionin apo pasurinë. A është kjo një nga format?! Mund të jetë dhe këtë e dini ju përderisa janë njësoj njerëzit, si ata që advokojnë për ligjin, si ata që e marrin Butrintin.
Zoti Braçe mund t’ju ftoj në kafe për të gjitha pyetjet, por më lejoni të mbaroj me ministren.
(Ndërhyrje pa mikrofon)
Zonja Ministre, nga ndryshon plani i menaxhimit të integruar, sepse atë të Solarit nuk e botuat kurrë, por qoftë edhe të Solarit dhe të Auron Tares, nga ky plani që keni sjellë ju këtu dhe cilat janë përmirësimet që mendoni ju? na e thoni me detaje, ne kemi durimin t’ju dëgjojmë. Në planin e menaxhimit të Butrintit sot nuk ka, dhe është e çuditshme, një fjalë të vetme për atë që janë pasuritë, po ashtu të mbrojtura nga UNESCO, nënujore që parqet Butrinti, ekzistuese në planet e mëparshme dhe i zhdukur në planin tuaj të menaxhimit të biznesit, sepse i keni bërë një shkrirje biznesit me menaxhimin. Nuk ka asnjë fjalë në planin tuaj për atë që ishte ndërtuar atje për shkollën e guidave, prandaj u çuditët sa u përket shoqatës së guidave, sepse ishte ndërtuar një shkollë guidash në Butrint, e cila zhvillonte çdo vit aktivitet dhe, të paktën, prodhonin 10 guida për Butrintit nga njerëz lokalë që i merrnin, i shkollonin dhe i bënin guida në Butrint. Kjo ishte arritje Auron Tares. A e dini sa guida kemi tani?! Një guidë. Ju e keni hequr fare nga plani i menaxhimit pjesën e guidave. Duke qenë se Butrintin e keni quajtur qytet grek, ju parashikoni që edhe guidat t’i merrni nga Greqia, në mënyrë që t’i bëjnë ata guidat, sepse janë ata më të trajnuar?! Në planin tuaj të menaxhimit dhe ju e keni bërë publike keni thënë 27 herë që Butrinti është qytet grek.
Unë kam një pyetje, në qoftë se mund të na përgjigjet zoti Luan Bërzhita, a beson se Butrinti është qytet grek? Të gjithë profesorët që ishin këtu, që nga zoti Ceka, zoti Baçe dhe të gjithë profesorët që kanë kontribut në këtë vend kanë thënë se Butrinti nuk është qytet grek, përkundrazi, ata e argumentojnë që është shqiptar. Është në interesin tonë, si shqiptarë, që të mos jemi qesharakë kur bëhet fjalë për historinë tonë kombëtare, sepse ata do ta marrin në menaxhim. Atë që ju e shënoni si literaturën e rëndësishme të këtij plani menaxhimi, Hoxhisin, të cilin e keni bërë edhe anëtar të bordit, në të gjitha librat e tij, këtu poshtë prezent edhe kryetari i Komisionit, në të gjitha që ai ka shkruar dhe ju i keni cituar këtu, qoftë edhe në artikujt e tij shkencorë, që ju i quani, jo vetëm Butrintin e ka cilësuar grek, por edhe Sarandën e ka cilësuar qytet grek. Ky zotëria do të jetë menaxheri i Butrintit në bordin e Butrintit. Zoti Spaho ju përmendi rastin e Ugolinit, i cili mori kokën e Deas, e futi në valixhe dhe e mori që ta kalonte në Itali, por e kapi një xhandar.
Kjo është historia
Në fakt, kush na garanton ne, se ai ishte studiues i nderuar, që këta, të cilët nuk janë as studiues të nderuar, nuk do t’i tjetërsojnë ato që zbulohen në Butrint, historinë e Butrintit, tabelat e Butrintit dhe atë që do t’u paraqitet qytetarëve në Butrint? Kush na i garanton?! Sepse ndaj është garancia shtetërore, ndaj e administron shteti, sepse supozohet që shtetit i dhimbset identiteti kombëtar dhe pasuria kombëtare, gjë që nuk i dhimbset asnjë fondacioni privat, sado filantrop e zemërgjerë qoftë ai. Meqenëse kemi përfaqësues nga fondacioni, le të na thotë në cilin rast kanë administruar një sit arkeologjik, sepse nuk besoj se e krahason njeri Butrintin me Pazarin e Ri, pra në cilin rast AADF-ja, meqenëse ju thatë ka eksperiencë 5-vjeçare, ka administruar dhe ka në menaxhim një sit arkeologjike që ne ta dimë se kanë eksperiencë në këtë fushë?
(Ndërhyrje pa mikrofon.)
Këto janë vetëm për këtë komision, sepse ka edhe të tjera për komisionet e tjera.
(Ndërhyrje pa mikrofon.) Unë kam durim, për aq kohë sa kohë sa jam në anën e të drejtës. Për sa i përket vlerës së biletës, në planin tuaj keni cituar 15 site që i krahasoni; i keni marrë të gjitha me radhë, që nga Koloseu, shumë mirë, përgëzime! I keni marrë këto site dhe i keni krahasuar për çmimin e biletës, sepse ai ju intereson, sepse atë do të rrisni. Pse nuk i keni marrë këto site dhe t’u vini përkrah formën se si menaxhohen dhe ta krahasojmë ne se si menaxhohet, pasi kjo nuk do t’u leverdiste.
(Ndërhyrje pa mikrofon.)
Faleminderit! Në qoftë se ju do të keni mirësinë që këto site, të cilat i krahasoni për çmimin e biletës, t’i krahasonit edhe për formën e menaxhimit, atëherë do të dilte se asnjë nga sitet nuk ka një formë menaxhimi të dhënë të një fondacioni privat të krijuar posaçërisht me vendim gjykate, si një entitet më vete për të menaxhuar Butrintin. Në qoftë se do të ishte ministria, nuk do të kishte nevojë fare as për vendim gjykate dhe as për regjistrim fondacioni të ri, siç është bërë bordi aktual, që është me VKM, do të ishte një VKM për të shtuar një anëtar të bordit, por jo, është një etnitet tjetër, është një etnitet privat, ku ministria ka lëshuar të drejtat e saj për t’ia dhënë privatit dhe ju keni vendosur një shtojcë se si dorëzoni pasurinë e paluajtshme te fondacioni privat dhe i ngarkoni fondacionit të shkojë dhe ta regjistrojë këtë gjë në kadastër, sepse do ta ketë në përdorim të plotë, në menaxhim të plotë, për 10 vjet dhe duhet të jetë autoriteti…
(Ndërhyrje pa mikrofon.)
Që ta qartësojmë: Butrinti, për të gjithë ata që e kanë merak, nuk shitet, Butrinti jepet falas në përdorim me koncesion për 10 vjet, e përsëris, sepse nuk ka njeri që mund ta blejë Butrintin, nuk është në shitje Butrinti. Si ju shkon mendja që mund të shitet Butrinti?!
(Ndërhyrje pa mikrofon.)
Në një deklaratë të bërë, përfitoj nga rasti që është edhe fondacioni, thuhet se kemi investuar 1,2 milionë dollarë në Butrint për tabelat, për një kioskë biletarie dhe për dy kamera në hyrje. Zoti Tare thotë se këto investime janë investime, të cilat, tabelat kanë qenë ekzistuese dhe puna më e madhe është identifikimi i vendeve sesa thjesht replikimi i asaj tabele në një cilësi tjetër, a mundet ju t’ia vini në dispozicion këtij komisioni këtë bamirësi që keni bërë me Butrintin, të ndarë me zëra, sipas asaj që keni bërë për Butrintin, që të kemi mundësi që, realisht, këtë shifër që ju thoni, për të cilën ekspertët kanë dyshime, ndoshta ata e kanë gabim, të na I vërtetoni neve që janë dhënë këto para e janë shfrytëzuar në mënyrë të rregullt për Butrintin? Për ta mbyllur për këtë sesion këtu së bashku…
(Ndërhyrje pa mikrofon.)
Po, në komisione të tjera, jo këtu. Nuk e di nëse do të kemi këtu, por, nëse do të kemi, patjetër që do të jem prezent. Ajo që ju e mohuat ishte konflikti i interesit. Ndoshta edhe nuk ekziston. Kur të njëjtat gjëra prodhohen nga i njëjti etnitet, pra si ligji që të lejon, si plani që thotë si duhet administruar, si fondacioni që krijohet më pas në zbatim të planit dhe të ligjit janë po i njëjti etnitet, këtu ka dyshime të arsyeshme se është konflikt interesi. Sigurisht, ju mund të na thoni se nuk është.
Gjithsesi, unë ngelem e hapur për këndvështrimin tuaj pse nuk është ky konflikt interesi dhe qenka një gjë normale!
Së fundi, i keni dhënë vetes të drejtën, zonja Margariti, të jeni anëtare e bordit. Kur ju të mos jeni më ministri, duke qenë se është me vendim gjykate emri juaj, do të jetë dikush tjetër në funksionin e ministres, apo do të jeni përsëri ju anëtare e bordit të Butrintit, edhe kur mos të jeni më vetë ministre? Faleminderit!
PJESA 2:
Sa i përket ndërhyrjes së parë, bëra katër pyetje për fondacionin AADF dhe 17 pyetje për ministren, por s’kam marrë asnjë përgjigje. Sa i përket asaj që tha zoti Braçe, nuk është institucion publik, është i regjistruar në gjykatë me vendim nr. 858, datë 22. 7. 2021, është person juridik. Është krijuar një fondacion i ri, i cili e ka ministren si një anëtare të bordit, mes pesë të tjerëve. Nëse do të ishte fondacion publik…
(Ndërhyrje pa mikrofon) Nëse do të ishte ent publik…
(Ndërhyrje pa mikrofon)
Nëse do të ishte institucion publik, do të krijohej me VKM dhe do të ishte në varësi të Këshillit të Ministrave.
(Ndërhyrje pa mikrofon)
Ky fondacion nuk është krijuar me ligj. Ne po kalojmë me ligj vetëm marrëveshjen. Fondacioni është krijuar si OJF, me vendim të Gjykatës së Tiranës. Nga ana tjetër, në rast se…
(Ndërhyrje pa mikrofon)
Nëse mundem!
E falënderoj shumë profesorin, i cili pranoi të kundërtën e asaj që thotë vetë plani i menaxhimit, dhe unë do ta citoj. Faqja 15 e Planit të Menaxhimit të Integruar të Parkut Kombëtar të Butrintit thotë se Butrinti ka qenë vend i një kolonie greke, qytet romak dhe peshkopatë.
(Ndërhyrje pa mikrofon)
Plani i menaxhimit, që ju do të votoni, mbi bazën e të cilit…
(Ndërhyrje pa mikrofon)
Po ashtu, e gjeni edhe në faqen 77 të planit të biznesit, ku përqendrohen vendbanimet greko-romake, siç është rasti i Butrintit e të tjera e të tjera, është 27 herë. Falemnderit, profesor, që nuk jeni dakord me këtë! Nga ana tjetër, për sa i përket asaj që zonja Denaj tha në lidhje me gjendjen e keqe të parkimit e të tjera e të tjera, keni nëntë vjet në pushtet, ka qenë detyrimi i qeverisë. Jam dakord se Butrinti ka nevojë për përmirësime të jashtëzakonshme, por duhet të jetë publike dhe duhet të mbajë përgjegjësi shteti, gjë për të cilën ajo ministre paguhet atje.
(Ndërhyrje pa mikrofon)
Së fundmi, kërkoni letrat nga UNESCO.
Na sillni gjithë dokumentacionin e UNESCOs, që ju nuk e keni!
Faleminderit!
(Ndërhyrje pa mikrofon)