Fjalim në Kuvend mbi keqqeverisjen dhe abuzimet në sistemin shëndetësor / 12 Shtator 2024

Kjo, në fakt, është seanca e parë ku ne mund të flasim pas mbylljes së sesionit të kaluar dhe hapjes së sesionit të ri. Sigurisht, edhe rendi i ditës së sotme do të reflektonte filozofinë me të cilën keni bërë të gjitha rendet e ditës dhe të gjitha vendimmarrjet, vendimmarrje që çojnë ujë vetëm tek ata që i interesojnë qeverisë; vendimmarrje që tentojnë të kapin çdo pushtet dhe të kontrollojnë çdo degë të këtij vendi.  Urdhri i Mjekut nuk quhet Urdhër i Mjekut që ju t’i urdhëroni mjekët, por quhet Urdhri i Mjekut, sepse janë vetë mjekët që do të duhet të vendosin se si organizohen dhe qeveria do të duhet vetëm t’i dëgjojë, do të duhet t’i ndihmojë dhe do të duhet të jetë krah kërkesave të tyre për të bërë rregullime ligjore që u shkojnë për shtat mjekëve. Problemi në këtë vend nuk janë mjekët, nuk ka asnjë prej kolegëve këtu, siç tha edhe kolegu parafolës, që të anatemojë mjekët, përkundrazi ata janë po ashtu viktima të një sistemi shëndetësor që paratë nuk i dërgon te nevojat e sistemit, por i çon te nevojat e drejtorëve dhe të ministrave, sepse nuk e zgjidh ky ligj, nëse i ndalon të punësohen në privat dhe sa kohë do të punësohen në privat; mungesën e ilaçeve tek Onkologjiku apo në spitalet tona nuk e bën mjeku, e bën drejtoresha, ministrja dhe kjo qeveri; nuk e bën mjeku, që pasi harxhoni 250 milionë euro koncesion, erdhi drejtoresha e QSUT-së, Alma Cani, në komision hetimor dhe kur i tregova me fakte që kishte firmosur tenderin e marsit të vitit 2024, për të blerë të njëjtat gjëra që duhet t’i bënte koncesionari, përgjigjja ishte: “Nuk e di, nuk e mbaj mend se çfarë tenderash bëj, ja ta shikoj dhe do t’ju kthej përgjigje me shkrim”, ndërkohë që harxhoheshin 1,8 milionë euro për të blerë veshjet njëpërdorimëshe dhe të gjitha mjetet që do të duhej t’i bënte koncesionari. Tani, ose gënjejnë dhe nuk i bën koncesionari dhe i bëjnë këta të shkretët, ose vjedhin paratë e tenderit dhe i bën koncesionari. Në të dyja rastet është shpërdorim, vjedhje dhe abuzim i detyrës. Si e zgjidhim ne këtë? Duke mos i lejuar mjekët të jenë më shumë kohë në privat. Unë nuk e di, por ju i mendoni shqiptarët si njerëz që nuk e kuptojnë dhe doni t’u hidhni hi syve se me demek po e rregulloni sistemin e shëndetësisë duke i rënë mjekut më qafë.  Ajo për të cilën mua më vjen keq është që ju edhe për të ardhmen, edhe për studentët e Mjekësisë vazhdoni me të njëjtën mënyrë, siç i trajtoni mjekët sot, me detyrimin për të bërë atë që thoni ju se ndryshe do të kenë penalitete. Edhe versioni i ri që ne po e shqyrtojmë, dhe Komisioni për Edukimin dhe Mjetet e Informimit Publik po e shqyrton si komision përgjegjës, për studentët e Mjekësisë ka të njëjtën filozofi me atë që rrëzoi Gjykata Kushtetuese, thjesht ul vitet, thjesht nuk do të rrish 5 vjet, por do të rrish 3 vjet, nuk do të rrish 2 vjet, por do të rrish 1 vit, por nuk ndryshon filozofia juaj që këto gjëra nuk zgjidhen duke i mbajtur në burg, këto gjëra nuk zgjidhen duke punuar 1 vit si mësimore në Shqipëri që të shkojnë mjekë më të mirë në Gjermani.  

Këto gjëra zgjidhen duke bërë politika motivuese, këto gjëra zgjidhen duke i dhënë mundësinë atij që ta ushtrojë me dinjitet profesionin e mjekut, që kur të shkojë në punë, të jetë i lumtur për kushtet që ka, për aparaturat që ka dhe për ilaçet që ka depoja e spitalit dhe që mund t’ua vërë në dispozicion pacientëve dhe jo kur të shkojë atje të mos ketë dot as ujë të rrjedhshëm nëpër tualetet e spitalit.  

Në fakt, ajo që duhet të kuptojnë të gjithë shqiptarët është që paratë janë, sepse gënjeshtra e madhe është që: ne e kemi dëshirën e madhe (e thoshin edhe në komision), por nuk kemi mundësitë. Paratë janë, mungon vullneti politik i qeverisë për t’i çuar paratë te qytetarët, në këtë rast te mjekët, te pacientët, te studentët e Mjekësisë, në raste të tjera te qytetarët, te pensionistët, te rinia dhe te studentët. Jo, sepse ju doni t’i çoni tek oligarkët, tek ata që u jepni koncesione, te miqtë, tek ato shifrat që tregonte Arben Ahmetaj, se si pas një darke shtohej fatura 50 milionë euro, aty i çoni paratë. 400 milionë euro janë vetëm inceneratorët që nuk ekzistojnë. Përgjegjësia zero.  

Del Kryeministri juaj në kongresin e partisë dhe thotë: fajin që nuk rriten pensionet e kanë biznesmenët dhe biznesi i ndershëm në Shqipëri, sepse ata fshehin të ardhurat që marrin punëtorët e tyre. A thua se qeveria sa erdhi në pushtet, jemi në vitin 2013, edhe fshehja e këtyre të ardhurave kishte ndodhur me qeverinë e Partisë Demokratike e ndaj nuk i rriste dot në vitin e parë të qeverisjes, ndërkohë që ka 12 vjet që i kontrollon edhe bizneset, por, mbi të gjitha, nuk mundet ta gjejë fajin e menaxhimit të të ardhurave publike te privati. Shqiptarët votojnë qeverinë, nuk votojnë privatin, i cili mund të zgjedhë 100 mekanizma për ta shkelur ligjin, por është qeveria që duhet ta garantojë zbatimin e ligjit dhe çuarjen e parave atje ku ka nevojë.  

Dështuat në mënyrë të suksesshme me turizmin. Thatë: 10 milionë na erdhën, por do të na vijnë 20. Kur është sukses turizmi, siç ishte vitin e kaluar, është suksesi i qeverisë, kur është turizmi dështim si sivjet, është për fajin e bizneseve, pra gjithmonë e ka fajin dikush tjetër, qeveria nuk është njëlloj bashkëndarëse e suksesit dhe e dështimit në një sektor, vetëm kur ka sukses është meritë e qeverisë.  

Bjerini biznesit dhe mbani vetëm oligarkët, vetëm ata klientët që ju sjellin dhe i ndajnë paratë me ju, sigurisht është në filozofinë e partisë suaj mëmë që të mos ta doni sipërmarrjen e lirë dhe biznesin. I ngopët me gjoba bizneset turistike për një udhëzim që e keni antiligjor, për ujërat  e ndotura, teksa edhe ata që kishin mekanizma për ujërat e ndotura duhej të paguanin gjobën, sepse nuk e kishin blerë aparaturën ku e donte ministrja Kumbaro. Mirë që e pamë sot se erdhi Rama, ju erdhi zor ministrave dhe rrinin këtu nga frika, se ndryshe nuk e shohim Kumbaron në Kuvend. Që të japë llogari jo e jo, që të flasë për autorizimet që lëshon për mbetjet e rrezikshme për turizmin, për mjedisin, jo e jo, të flasë për ato projektvendime që kalon për t’u ulur mbrojtjen zonave të mbrojtura jo e jo, por ama ministrja më jetëgjatë e qeverisë, ministrja më jetëgjatë në 3 mandate, pse ka rekorde pozitive? Jo pra, por pikërisht për këtë që po them unë, për mungesën e llogaridhënies, për fshehjen dhe për shërbimin që i bën çdo urdhri që i jep Edi Rama, pavarësisht se e shkel Kushtetutën apo ligjin. Ky është modeli për të cilin ne sot ngremë zërin, ky është modeli për të cilin qytetarët shqiptarë ikin nga vendi dhe ju pastaj jeni të detyruar të shpikni statistika zyrtare që i prodhoni vetë, me demek vendi nuk është shpopulluar, me demek se shkollat që mbyllen dhe numri i nxënësve që bie është thjesht imagjinatë e opozitës, se njerëzit duhet ta shohin realitetin vetëm me syzet e RTV-së apo të kanaleve të tjera, të cilat propagandojnë atë që thotë qeveria dhe jo me sytë e tyre të lirë, në jetesën e tyre të përditshme.  Doni të kontrolloni kush do të jetë opozita; doni të kontrolloni kush do të jetë lideri i opozitës; doni të kontrolloni se çfarë rezultati do të duhet të marrë Partia Demokratike në zgjedhjet e ardhshme; doni ta ktheni vendin në vitin 1997, në një luftë civile, sepse vetëm kështu mund të fitoni, vetëm kështu mund t’i shmangeni verdiktit qytetar me votë të lirë dhe të ndershme, që do t’ju dërgojë në shtëpi. Në fakt, ju nuk e keni vendin në shtëpi, shumica juaj e ka vendin atje ku janë kolegët e tjerë socialistë, në qelitë e burgut 313. Është detyrë qytetare jona, në fakt, që secilin fakt publik që kemi ta dërgojmë para drejtësisë, pavarësisht besimit ose jo në të, sepse dita e gjykimit do të vijë për ju. 

Faleminderit!