Deputete e Partisë Demokratike në Kuvendin e Shqipërsië | 2021 - 2025
Nga sot ne nuk do t’ju drejtohemi më “zonja Kryetare”, do të jesh vetëm zonja Spiropali, sepse keni shkelur Kushtetutën dhe Rregulloren dhe keni kërkuar që këtë Parlament ta ktheni në një seksion të Partisë Socialiste, duke përjashtuar pa ligj, pa rregullore dhe pa të drejtë deputetët e opozitës, që ju këtu të bëni teatër dhe t’i kaloni ato ligjet fap e fap, që vjedhin qytetarët shqiptarë. Ndërkohë që opozitës i vutë atje Policinë e Shtetit, forcat speciale, Gardën e Republikës, kangjella dhe hekura dhe këtu ju mbanit fjalim duke thënë: duam të flasim me opozitën. Sa false jeni dhe sa false dilni tani edhe në dritën e vendimit të gjykatës.
Zotëria atje i Sky EncroChat thotë: pse e çuat në gjykatë ju? Ju duhet të merrni të mirëqenë vendimet e Bushkës dhe të Spiropalit, sepse ne jemi shteti, ne vendosim, ne ju përjashtojmë sa herë që duam dhe si të duam dhe ju mos shkoni asgjëkundi, sepse kështu po shkelni Kushtetutën. Po kush i beson këto? Kush e beson se ju paskeni të drejtë këtu të vendosni se kur duhet të vijmë ne, sa duhet të flasim ne, se çfarë opozite duhet të bëjmë ne dhe se çfarë qëndrimesh duhet të mbajmë ne?! Diktatura mund të jetë ëndrra juaj, regjimi mund të jetë ëndrra juaj, emri Partia e Punës mund të jetë nostalgjia juaj, por ne jemi këtu që ajo ëndërr juaja të mos realizohet kurrë, ne jemi këtu që të mbrojmë interesat e qytetarëve. Ju, zonja Spiropali, së bashku me zonjën Bushka sot, edhe me ata që firmosën, një ju mungon se e keni në burg, duhet të jepni dorëheqjen, duhet të ikni nga ky Parlament me turp madje, sepse përjashtuat 24 deputetë të opozitës; se ju donte qejfi apo se ju dha urdhër politik Edi Rama, këtë nuk e ndajmë dot. Një gjë është e sigurt, që ju keni shkelur Kushtetutën.
Ka të drejtë zotëria, i cili tha se ne nuk i diskutojmë vendimet e gjykatës. Jo, ju nuk i diskutoni, thjesht i shkelni. Ju votoni që të mbani Olta Xhaçkën këtu, ju i lini profesionet e lira të paguajnë ende paratë dhe të mos u kthehen ato që kanë paguar, ju nuk e ndryshoni ligjin për komisionet hetimore ashtu siç jua ka shfuqizuar Gjykata Kushtetuese dhe ne vazhdojmë të hetojmë me një që hetohet për korrupsion, si Plarent Ndreca, sepse këtë doni ju, të bëni një parlament fasadë, me demek po hetojmë, me demek po flasim, me demek kemi normalitet, ndërkohë që kemi vetëm vjedhje, shkelje dhe manipulim, dhe ky është turpi i kësaj mazhorance.
Ju sot duhet të mbani përgjegjësi së bashku me zonjën që drejton Sekretariatin, duhet të largoheni, duke i hapur rrugën këtij Parlamenti. Sigurisht, qeveria duhet t’ju ndjekë për të shkuar në një qeveri teknike dhe për të shkuar në zgjedhje me dinjitet dhe me rregulla të barabarta loje dhe jo kështu, siç i vendosni ju.
Të lutem, mos e përdor më zyrën e medias për të dërguar njoftimet e tua si drejtuese politike, se latë nam!
Faleminderit!
