Deputete e Partisë Demokratike në Kuvendin e Shqipërsië | 2021 - 2025
Zonja Ministre, unë edhe ti kemi një të përbashkët: jemi të dyja deputete të qarkut të Vlorës dhe specifikisht jemi përfaqësuese politike të Sarandës, Finiqit, Konispolit dhe Delvinës. Jua sjell në vëmendje këtë, sepse, në fakt, fjala ime lidhet pikërisht me zonën tonë elektorale dhe pikërisht me shqetësimet që më vijnë nga peshkatarët e Sarandës. Të martën kam pasur takim me ta dhe, në vazhdën e këtij ligji që do të kalonte, pa e ditur, në fakt, që do ta vendosnit në rendin e ditës, kemi diskutuar për problemet që ata hasin dhe për nevojat që kanë. Në momentin kur ju u bëtë Ministre e Bujqësisë, realisht menduam se do t’i kthenit sytë më shumë nga qarku i Vlorës dhe do të bënit diçka më shumë për sektorët që lidhen edhe me qarkun e Vlorës. Sa herë kemi diskutuar në këtë Parlament për fondet e AZHBR-së, në fakt, të gjitha palët kemi harruar që edhe peshkimi prekej, jo vetëm bujqësia, nga mungesa e fondeve të AZHBR-së. Siç ju e dini, fondet e AZHBR-së u anuluan më 28 dhjetor dhe pasoja kishin edhe anijet e peshkimit që kishin përfituar nga këto fonde për të bërë punime dhe ndryshime në motorë. Në datën 5 janar, zonja Ministre, është dhënë urdhër për kthimin e këtyre motorëve, që kanë qenë objekt përfitimi i kontratave të lidhura midis peshkarexhave të Sarandës dhe AZHBR-së. Në qarkun e Vlorës kanë qenë 11 përfitues, 4 në Sarandë dhe 7 në Vlorë. Këta janë detyruar dhe, 10 nga përfituesit, përveç njërit, i kanë kthyer paratë që kanë marrë, ndërkohë që investimin për motorët e rinj e kishin bërë. Ju e dini shumë mirë që këta peshkatarë nuk kanë njohur kurrë subvencione nga shteti. Edhe kur ua dhatë këta 10 motorë, ata u detyruan t’i kthejnë mbrapsht, se kthyen paratë mbrapsht, dhe janë dëmtuar dyfish, sepse kanë hequr motorët e vjetër, të cilët, në fakt, ishin ende në gjendje pune, për të marrë motorë të rinj. Tani u duhet t’i paguajnë vetë motorët e rinj që vunë dhe të harxhojnë më shumë lekë, më shumë kohë dhe, në fakt, rezultati i shkon peshkimit, punës së tyre, familjeve të tyre. Nga ana tjetër (këtë e them për të gjithë ata që nuk e dinë), ata që punojnë në peshkim, ata që punojnë me varkat, me anijet, me peshkarexhat, e paguajnë naftën më shtrenjtë se jahtet. Pra, anijet që bëjnë punën dhe anijet e qejfit e të luksit paguajnë dy çmime të ndryshme: ato të qejfit e të luksit e paguajnë më lirë dhe ata të hallit, të punës, të djersës së ballit, e paguajnë më shtrenjtë. Kjo nuk është situatë normale dhe nuk është situatë sporadike e peshkatarëve të Sarandës, por është në të gjithë Shqipërinë. Në fakt, juve, si ministre përgjegjëse, do t’ju duhet të merrni masa që kjo të ndryshojë, minimalisht të barazohet me jahtet, për këta njerëz që mbajnë familjet, që merren me një punë jashtëzakonisht shumë të vështirë, një punë e cila nuk ka kufi kohe, natën e ditën, për tregtimin e asaj që peshkojnë. Unë dua të ndalem në mënyrë specifike te Saranda. Ju i keni takuar peshkatarët në fushatën e vitit 2023, teksa ia çuat kandidatit Olti Çaçi, se ai nuk njihte njeri, për të ditur se kush ishte dhe kush nuk ishte peshkatar, sepse ishte importuar nga Durrësi, si peshk i sjellë, që nuk fitoi nga importimi, por fitoi nga paratë e importuara. Pra, ia çuat peshkatarët dhe bëtë premtime për ta, edhe ju si qeveri, edhe ai si kryetar i ardhshëm i bashkisë. Qysh nga ai takim i fushatës, nuk ka pasur më asgjë për peshkatarët e Sarandës.
Sigurisht, kur të vijë viti 2025, ju, nëse do të jeni në qarkun e Sarandës, besoj se do t’i takoni prapë, besoj se do t’u thoni prapë të njëjtat premtime.
(Ndërhyrje pa mikrofon)
Më fal, në qarkun e Vlorës, në qytetin e Sarandës! Faleminderit për korrigjimin, se mund të dilja keq! Rrofsh!
(Ndërhyrje pa mikrofon)
Në fakt, edhe në një qark tjetër duhet të ricikloni të njëjtat premtime, sepse ndërkohë asgjë nuk keni bërë.
Nuk kanë kalata ankorimi për anijet e tyre, për peshkarexhat. Ju këtë e dini, sepse jua kanë thënë qysh në vitin 2021, por situata vazhdon e njëjtë, si me atë që ishte para jush, si me ju. Në fakt, nga ana tjetër, mbrezhat, kështu quhen rrjetat e varkave të vogla, hidhen vend e pavend dhe u shkaktojnë dëm shumë të madh edhe te peshkaraxhat që janë të ndaluara, që pastaj të bëjnë gjuetinë aty, por edhe te varkat e vogla, ku shpeshherë humbasin veglat e punës. Për këtë nuk ka asnjë ndërhyrje as nga pushteti lokal dhe as nga pushteti qendror. Në këtë Parlament, edhe kur ishte paraardhësja juaj, edhe kur ishte një kryetar tjetër bashkie, e kam ngritur shqetësimin që në atë port nuk ka drita, nuk ka ujë, nuk ka korrent për peshkimin. Mbeturinat, që duhet të ishin detyrë kryesore e bashkisë, kthehen në detyrën e njerëzve që punojnë atje, sepse nuk mund t’i lënë malet me plehra dhe mundohen të organizohen vetë, për të mos u qelbur. Ky është realiteti i së martës, jo i para 2 javëve apo i para 1 muaji.
Nëse ju do të kishit bërë politika ndihmuese, si në çdo sektor tjetër, duhet të na prezantonit sot apo të na kishit prezantuar më parë me paketat lehtësuese fiskale që ju do të bënit. Ju duhet ta dini shumë mirë që, flas sidomos për Sarandën, nuk ka më fuqi punëtore. Ashtu siç është drama e madhe e shpopullimit në çdo sektor, sigurisht që e ka prekur edhe peshkimin dhe sigurisht që të huajt që ata marrin (jam e bindur se ju e dini që ata punësojnë të huaj, të cilët ende nuk e dinë gjuhën) kanë edhe një seri dokumentacionesh që duhet të plotësohen nga shteti shqiptar. Mirë që nuk bëni as edhe një politikë që t’i shtyni njerëzit, që t’i shtyni të rinjtë të ndjekin arsimin profesional, që të merren me peshkimin, që t’u jepni një dorë edhe për të ardhmen, teksa tregoni objektivat e vitit 2030 (se si do të realizohen këta objektiva pa para e pa fuqi punëtore, unë nuk e di), por edhe kur marrin fuqi të huaj punëtore, minimalisht të bëhet një përpjekje për t’i ndihmuar në pjesën e dokumentacionit, që të mos kenë probleme as pronarët e tyre dhe as ata që marrin në punë.
Kjo është situata dramatike, në fakt, e qytetit që unë përfaqësoj. Duke e ditur mënyrën si funksionon qeverisja, jam e bindur se nuk duhet të jetë shumë më e mirë në portet e tjera dhe me peshkatarët e qyteteve të tjera, megjithatë nuk e marr përgjegjësinë ta them me bindje. Gjithsesi, nuk besoj se ju, si deputete e qarkut, e keni lënë më keq Sarandën se portet e tjera, kështu që në këtë gjendje duhet të jenë edhe portet e tjera, limanet e tjera, sepse nuk besoj se ju do ta linit mënjanë Sarandën. Besoj të kundërtën, që ju duhet të kishit prioritet qarkun që ju ka zgjedhur dhe qytetin që përfaqësoni. Kur atje gjendja është mjerane, në qytetet e tjera bregdetare gjendja duhet të jetë edhe më keq.
Zonja Denaj, për mua ka më shumë rëndësi gjendja dhe realiteti i banorëve që unë e ti përfaqësojmë sesa një ligj që, në fakt, është në një moment përafrimi me legjislacionin e Bashkimit Europian. Mua më intereson që ata banorë të marrin një shërbim, nuk e kam problem të vendoset fytyra juaj dhe të merrni edhe ju vota, duke e bërë këtë punë që unë ju kërkoj. Më mirë të bëhet puna, sesa askush të mos marrë përgjegjësinë të flasë për ata njerëz që na kanë votuar, që na kanë sjellë këtu dhe që e nxjerrin bukën e gojës me djersën e ballit.
Shumë faleminderit!